بشوف ناس كتير جدا بتختار معظم تمارينهم بشكل عشوائي وتلاقيه مختار كل التمارين الي بتحمل علي العضلة في وضع الانقباض ومبيلعبش غير تمرين واحد في وضع الاستطاله مع ان الانقباض هو اضعف وضع العضلة فيه بتنتج قوة ودا ياخدنا لسؤال مهم جدا

 

ايه هي مواضع التحميل علي العضلات أساساً ؟؟

احنا عندنا تلات مواضع للتحميل علي العضلات وهما كالآتي

اولا وضع الانقباض ودا بنسميه shortened position

ودا العضله بتكون في اقصي انقباض وقصيره فيه

ثانيا وضع المنتصف ودا بنسميه middle position

ودا العضلة بتكون في منتصف الحركه فيه

ثالثاً وضع الاستطالة ودا بنسميه lengthen position 

ودا العضلة بتكون في اقصي استطاله ليها فيه

 

طيب هي العضلة بتكون قوية في انهي وضع تحميل وضعيفة في انهي وضع ؟؟

علشان نجاوب علي السؤال دا خليني اديلكم مثال بسيط ، لو جبنا عضله و خدنا منه ليفه عضلية واحده ، وحطيناها علي جهاز بغرض قياس القوة الي هتنتجها الليفه العضليه دي خلال التمرين ، هنلاحظ انه خلال الاختبار هنلاقي ان الليفه العضلية بتنتج قوة مختلفه في مواضع مختلفه ، يعني كمثال الليفه العضلية دي لما بتكون طويلة او في وضع استطاله بنتنج قوة مختلفة عن وهي قصيره ومش معمولها شد واستطاله بمعني انها في وضع انقباض او منقبضه ، مع ان هي هي نفس الليفة العضلية ولكن قوتها بتقل لما تكون قصيره وقوتها بتزيد لما بتكون طويله ودا بنسميه في علم البايوميكانكس ب length tension relationship .. وبنسميه برده strength curve ودا بيحصل بسبب نظرية اسمها الخيوط المنزلقة sliding theory of muscle contraction والنظرية دي بتشرح ميكانزيم انقباض العضلات تحديدا انزلاق المايوسين والاكتين ، وال strength curve دا او قوة العضلة في مواضع التحميل المختلفة ليه علاقة مباشرة مع عزم الدوران الي بيقيس القوة الموضوعه علي مفصل معين مضروبة في زراع العزم والي بنقدر نستنتج منه عزم الدوران علي المفصل والقوة الناتجه من العصلة لتحريك المفصل دا حيث ان العضلات بتشغل مفاصل وكل ما قربت من المفصل قلت القوة وكل ما بعدت عن المفصل زادت القوة المطلوبة لحمل الوزن ، ودا كله يعتبر دلالة مباشرة عن تماشي اي تمرين مع كيرف المقاومة او القوة وبيدلك علي القوة الي العضلة بتنتجها في اي جزء من الحركه وتقدر تقيسه طبعا بالمعادله الي قولت عليها علشان تعرف العضلة بتنتج قوة اعلي في انهي جزء من الحركه في التمرين وبالتالي نستدل علي ال resistance profile لحركة التمرين نفسه 

 

طيب ايه المهم في كل الي انا قولته دا ؟؟

المهم عندي في كل دا انك تعرف امتي العضله بتكون قوية وامتي بتكون ضعيفة امتي العضله بتنتج اعلي قوة قصاد المقاومة الخارجية وامتي بتنتج اضعف قوة ، فبكل بساطه العضله بتكون في اضعف حالتها وهي في وضعية الانقباض وهينتج عنه اقل حمل ميكانيكي والعضلة بتكون في اقوي حالتها في وضعية المنتصف او وهي في منتصف المدي الحركي ، انما وضعية الاستطالة العضلة اقوي بكتير من وضعية الانقباض ودا بسبب مشاركة الاوتار مع الالياف العضلية في حمل الوزن وانتاج القوة حيث ان الوتر عامل زي الاستيك هيديلك اكبر قوة لما يتشد ويتعمله ستريتش طويل مع الليفه العضلية ولكن وضع المنتصف يظل هو اقوي موضع من التلات مواضع

 

طيب ليه من المهم انك تفهم مواضع التحميل علي العضلات ؟؟

مهم علشان لما تيجي تختار تمارينك تفهم وتعرف انك لازم تمزج ما بين تمارين بتحميل في وضع الاستطالة وتمارين بتحمل في وضع الانقباض وممنوع ان معظم تمارينك تكون بتحمل في وضع الانقباض فقط لانك هتكون اهلكت العضله وهي في اضعف وضع ليها بدري بدري وسايب في التانك كتير لان وضع الاستطالة العضله فيه بتنتج قوة اعلي من وضعية الانقباض وبيحصل فيها تجنيد اعلي لالياف عضلية اكثر بسبب الحمل الميكانيكي الموضوع علي العضلة في الوضع دا والي بيجبرها تنتج قوة اعلي بكتير وبالتالي هتزيد افضل زيادة عضلية ممكنه .. وبرده مينفعش ان كل تمارينك تكون بتحمل في وضع الاستطالة لان دا هيسبب اجهاد رهيب علي الجهاز العصبي وهيتطلب وقت طويل علشان يحصل استشفاء لجسمك خصوصا لو مش مختار فوليوم التمرين الاسبوعي بتاعك بشكل مناسب ليك ولطبيعة حياتك وشغلك ويومك واكلك وتمرينك ، يعني تخلي تكون بتلعب فوليوم عالي والفوليوم دا تكون بتلعبه كله للفشل العضلي ومعظم التمارين تكون بتحمل في وضع الاستطالة ، الموضوع هيكون مرعب لجهازك العصبي ولجسمك وهتعيش في الم واجهاد دائم مهما كلت ونمت .. 

 

وأخيراً انا عاوزك تعتبر التمارين ادوات ومتتعلقش بتمرين معين والتمرين دا يكون سئ في كل شئ ولكنك مصر تعمله لانك متعلق بيه الافضل تفهم هل الإداه دي هتسهل عليك الوصول لهدفك ولا هتصعبه وبناء عليه تختار الادوات المناسبه علشان تسهل عليك رحلتك ، يعني كمثال انا مفيش لاعب عندي بيلعب بدامبل حر او بار حر ومبدل كل ادوات التمرين دي بتمارين الكابل لانها بتحمل علي العضلة في كل جزء من الاداء والمدي الحركي فهتحمل في الانقباض وفي الاستطالة كمان وبالتالي فهي أداه افضل ميت مره من الدامبل ، يعني مفيش مقارنة ما بين تمرين البينش بريس او التجميع علي الدامبل وعلي الكابل ، الكابل يكسب 100% ، وكذلك حاجه زي تمرين التفتيح دا تمرين ملوش اي تلاتين لازمه الحقيقة وضعيف جدا ولكن لو مصر تعمله ومتعلق بيه جدا اعمله علي الكابل مش بالدامبل ، وفي النهاية انا عاوزك تعرف كل دا علشان في الاخر تعرف حاجتين اتنين لما تيجي تبص علي اي تمرين وتحلله 

اولا التمرين دا بيحمل علي انهي مفصل من مفاصل الجسم

ثاننياً التمرين دا بيحمل علي العضلة في انهي وضع  التمرين دا بيحمل علي العضلة في انهي وضع استطالة ولا انقباض