من كتابي (اوفردوز دماغ : المرجع الكامل في النواقل العصبيه وهرمونات الدماغ وشرح مركبات وادوية رفع القدرات المعرفيه والإدراكيه .. لطلب الكتاب تواصل عبر الواتس اب)

 

(كيف تمنع الفتور والزهق وتتفادي الطلاق؟؟)

الحقيقه ان دي مشكلة كل الناس المتزوجين..انا الاول لازم اتكلم عن المسارات الي بتخلق الانجذاب بينك وبين الانثي وخصوصا لو مراتك علشان تفهم ازاي الانجذاب حصل في الاول وليه اختفي.. وطبعا الموضوع كله متعلق بالنواقل العصبية والخلايا العصبية (Neurones) 

 

بكل بساطه التجربه الجديد دائما بتتحفر وبتتخزن في مسارات عصبية وتجمعات عصبية.. ومع الوقت الشبكات العصبية دي والمسارات بتبقي مئلوفه ليك وكمية الاشارات العصبية الي كانت بتحصل من لمس واستحضار نفس المسارات دي مبقتش زي الاول .. يعني عارف احساس انك تشتري موبيل جديد وتكون مهتم بيه وفرحان بيه وخايف عليه وبتعتبره حاجه مهمه وبعدها بفتره خلاص مبقتش تهتم بيه وتخاف عليه ولو وقع مبيفرقش معاك اوي ؟؟

 

نفس القصه بتحصل بالنسبه للعلاقات .. كل حاجه بتشتغل بنفس الطريقه.. التجربه الجديده بتحفر الذكريات والمشاعر في مسار عصبي في دماغك وكل ما تزور الشبكه العصبية دي كل ما حساسيتك ناحيتها تقل وتبقي عاديه مش مبهره ولا هتموت عليها ودا شئ طبيعي جدا ، لان لو فضلنا نسبب اثارة للخلايا العصبية .. الخلايا دي هتموت من فرط الاستثاره ولذالك الجسم عنده دفاعات ضدد حاجه زي دي وفنفس الوقت الدوبامين بيحفزك دائما انك تروح للحاجات الي مش معاك والي بتكون غير متوقعه وخارج حيز ممتلكاتك .. والعلاقه الشخص بيكو فيها معاك وبتاعك ومنغمسين في تفاصيل وحياة بعض وحالياً جه الوقت اننا ندور علي احتياج تاني مش موجود معاك احتياج هيولد اثاره وحافز جديد ويعيد نفس الدائره ولما تمتلكه بعد فتره هتزهقه وهتكون عاوز حاجه مش ف ايدك وخارج نطاق ما تملكه .. لذالك الخيانات ملهاش علاقه بالجمال الحقيقه لان دائما بنشوف ان ممكن راجل يكون متجوز واحده جميله جدا ويخونها مع واحده لا تملك ربع الجمال الي عند زوجته

 

الاثاره الي بتحصل من التجربه الجديده بسبب استحضار وافراز الدوبامين مبتفضلش للابد.. ودائماً وأبدا هتختفي لذالك مفيش علاقة زواج بتتبني علي أفعال دوبامينيه فقط وبتكمل .. مستحيل مستحيل مستحيل.. دائما الرومانسيه والاثاره وانكم تكونو ميتين علي بعض وشايفين بعض الهدف الاسمي في الحياه.. دائما كل دا هيختفي اسرع من ما تتوقع

 

بعد ما حماس البدايات والشراره تختفي.. هيبقي قدامك خيارين..

1- يا اما تقرر انك هتعدي الجسر و تحول شرارة وحماس البدايات دا الي حب حقيقي مدعوم بأهتمام وتقدير لشريك حياتك بشكل يومي ومواجهة للحياه بكل عيوبها وصعوباتها الي هتخلق مع الوقت سعاده حقيقه تقدر تستشعرها في ذكري ومكان وشخص وضحكه ودمعه وحضن

 

2- يا اما تقرر انك محتاح زوحليقه دوبامين جديده تحسسك انك عايش وفالحاله دي انصحك جدا تفركش او تطلق او تنهي العلاقه وتدور علي علاقه جديده تديلك حماس البدايات  من تاني و تتحول الي زومبي وتفضل تعيد في نفس الدائره المغلقه وتعيش (اللذه اللحظيه فقط – anhidonia) للابد 

 

عاوزك تفهم ان اختيار زوحليقه الدوبامين (الخيار التاني) مش محتاح اي مجهود او تفكير وسهل جدا ولكنه بينتهي بسرعه زي ما بدأ ومجرد ما حماس البدايات ينتهي العلاقه بتنتهي

 

عاوزك تفهم ان اخيتار عبور الجسر (الخيار الاول) محتاج مجهود كبير والتزام ورغبه منك في المعافره وبذل المجهود وكانك هتلتزم بدايت ولكن الدايت دا كويس لصحتك البدنيه والنفسيه وهيخليك مع الوقت تحب الحياه وتحبه شخصيا

 

الدوبامين دائما هيكدب عليك (المفروض ان الكدب دا لمصلحتك لأسباب تطوريه وحفاظاً علي وجودك) ويحسسك بانعدام الرضاء وانك محتاج اكتر .. محتاح تاني ولسه مشبعتش، لو عايش فالشارع الدوبامين هيحفزك تشتري بيت تعيش فيه ولو عايش في بيت الدوبامين هيخفزك تشتري فيلا ولو عايش في فيلا هيحفزك تشتري قصر ولو عايش في قصر هيحفزك تبني قصر عالقمر .. الدوبامين ملوش حدود ومعندوش مبادئ وبيتحفز للحاجات والتجارب الجديدة الخارجه عن دائرة ممتلكاتك فقط ، الدوبامين هو ذرة عاوزه اكبر قدر من الموارد والمصادر علشان من وجهة نظره الحاجات دي مهمه لوجودك واستمرارك علي قيد الحياه

 

الدوبامين هو البدايه لكل قصه حب ولكن مينفعش يبقي اساس الحياه الزوجيه لانه بكل بساطه هرمون عاوز اكثر وافضل ودائما هيخدعك ويوهمك ان العلاقه الجديدة هي الي هتعوضك عن كل الي ناقصك في علاقتك الحاليه .. الدولامين هرمون تطلعي امبريالي كل مهمته هو تحريكك ناحية الموارد والمصادر ، والي فالسياق دا هتكون علاقات غراميه وخيانات زوجيه تحت اسم (مبقتش حاسس اني بحبه/ها) .. والحل الوحيد انك تستمتع بشريك حياتك وطبيعة حياتك بالشكل الغير كامل الي هي عليه وتقتنع ان هي دي طبيعة الحياه وتعيش اللحظه الحاليه وتتبسط بيها وتسيطر علي النزوات من لما تكون مجرد افكار قبل ما تتحول لأفعال 

 

للأسف مينفعش شبكة الدوبامين (اللذه والتطلع) تشتغل مع شبكة السيروتونين والاكوسيتوسين (السكينه والحميميه) .. الدوبامين في تصنيفه كناقل عصبي بيندرج تحت عائله النواقل الاستثاريه والسيروتونين بيندرج تحت عائله النواقل التثبيطيه  وصعب يكونو موجودين مع بعض في نفس الوقت 

 

الدوبامين عُمله زي الدولار كده .. عُمله وهميه ولكن ليها قيمه زي عملة الدولار كدا الي بتحرك اقتصاد العالم كله .. الدوبامين بيحرك البشر نفسهم واي كائن حي بداية من الديدان الي الإنسان ف خليك واعي واختار هتصرف الدوبامين بتاعك في ايه وخليك فاكر كويس ان الهرمون دا هو هرمون (عاوز اكثر) حتي لو انتا شبعان حتي لو مش محتاج اصلا .. ودا يفسرلك ليه ممكن شخص مش جعان يشم ريحه برجر ويروح يطلب مع انه مش جعان .. ومع اول وتاني قضمه الشعور الي كان متملكه والاثاره اختفت .. دا لان الدوبامين بيشتغل علي الخيالات والتوقعات المستقبله فقط ومجرد ما التوقعات او التخيلات دي تبقي حقيقه الدوبامين بيتم ايقافه لانه ميقدرش يتخطي حدوده .. هي دي حدود الدوبامين حيث انه ملوش دعوه بأي شي انتا بتمتلكه او في ايدك او فالحاضر وانما الدوبامين هو متخصص في المستقبل .. تحديدا في توقع المستقبل .. وانتا لازم تحول من الاثاره التخيليه الي انك تستمتع باللحظه 

 

وأخيراً عاوز اقول حاجه بسيطه بس تأكد ليكم علي ان الدوبامين مينفعش تقام عليه علاقه طويلة الامد زي الزواج وانما الموضوع في تفسيري الشخصي راجع ل ناقلين عصبيين مختلفين تمام وهما السيروتونين والاكوسيتوسين.. ودا لقدرتهم علي جعلك تشعر (بالسكينه) والطمأنينة والحميمه .. والرضا والقرب والاستمتاع والاكتفاء بالي معاك وف ايدك حالياً 

كما قال الله في كتابه عز وجل 

ومن آياته ان خلق لكم من انفسكم ازواجا (لتسكنو اليها) 

تحياتي ك.محمد مصطفي