ازاي تشتري مكملات الاوميجا3 بدون ما حد يضحك عليك ؟؟

ازاي تختار مكمل الاومجيا3 بتاعك ؟؟

هل كل اشكال الاوميجا 3 متساويين في القيمه والمميزات؟

في المقال دا هعرفك ازاي تختار افضل شكل من اشكال الاوميجا3 ..

وهعرفك تدور علي ايه بالظبط في مكمل الاوميجا3 وتبعد عن ايه ..

وهعرفك خصائص مميزات الاوميجا3 خصوصا لدماغك وخلاياك العصبيه و تركيزك وذكائك وقدراتك المعرفية والذهنية يلا بينا ..

في المقالات الي فاتت في سلسلة الاوميجا3 شرحت امور كتير جدا من ضمنها الفرق بين انواع الاوميجا3 .. وقولت انهم بينقسمو الي 3 اشكال أساسية وهما : 

1- حمض الإيكوسابنتاينويك – eicosapentaenoic acid ودا بنختصره الي EPA

2- حمض الدوكوساهكساينويك – docosahexaenoic acid ودا بنختصره الي DHA

3- حمض حمض ألفا-اللينولينيك – Alpha linolenic acid ودا بنختره الي ALA

وقولت ان اهم شكل من التلاته دول هو ال DHA فخلينا نفهم ليه انا بفضل الشكل دا تحديدا من الاوميجا3 عن باقي الاشكال ..

في الحقيقه ان 60% من دماغك مكون من احماض دهنيه وجزء كبير من الاحماض الدهنينه دي هو في الأساس DHA 

وجسمك مبيقدرش يصنع حمض ال DHA بنفسه بشكل طبيعي ولذلك لازم تحصله من الاكل خصوصا من المكؤلات البحرية والطحالب او من المكملات وبالمناسبه لو انتا نباتي فانتا في خطر كبير جدا بسبب انعدام تناولك للحمض الدهني المهم دا والي بيجي في الغالب من لحوم الحيوانات الي حضرتك مش حابب تناولها

هقولي بس انا باكل بذور “الشيا” و “اليقطين” هقولك ان دول بيحتوو علي شكل مختلف تماما من احماض الاوميجا3 وهو ALA ودا أسوأ شكل من اشكال الاومجيا3 .. ونسبة بسيطة جدا لا تتعدي 10% منه هي الي بتتحول بعد كده الي الاشكال الاكثر اهمية والي هي epa و dha

وفي الحقيقة ان حتي دهون الاوميجا الي ممكن نحصلها من اللحوم والدواجن والبيض لا تتعدي الـ 50مج اوميجا في اليوم 

دهون الاوميجا وتحديدا حمض الـ dha مهم جدا للحفاظ على صحة دماغك وذاكرتك و قدراتك المعرفية زي التعلم والحمض دا بيقدر يقلل الالتهابات والاكسده بشكل رهيب والاهم من دا كله وسبب حبي ليه هو قدرتة علي تخليق خلايا عصبية جديده و معالجة خلايا الدماغ العصبية لو حصل لها ضرر

فالحقيقه ان 60% من دماغك مكون من احماض دهنية وحمض ال dha بيكون 15-20% من القشرة الدماغية ودي المنطقه المسؤوله في دماغك عن الوعي والذكاء والإرادة كمان لذلك فهي من اهم مكونات دماغك

وعلي الصعيد الاخر قرنية عينك بتحتوي علي مكان بنسميه منطقة الريتنا “retina” ودا المكان الي بيحتوي علي الخلايا الي بتقدر تستقبل فوتونات الضوء وتعالجها وتحولها لصورة قادر تشوفها والمكان دا ايضا مكون من 60% من حمض الـ dha 

وفي الحقيقة ان كل مميزات دهون الاوميجا وتحديدا حمض الـ dha راجع لوجود 3 احماض اساسية في تكوين ال dha وبنسميها بالدهون الفسفورية وهي كالاتي : 

1- فسفاتيديل سيرين –  phosphatidylserine

2- فسفاتيديل كولين – phosphatidylcholine

3- فسفاتيديل ايسانولمين – phosphatidyl ethanolamine  

وفي الحقيقه ان ال3 دهون دول بيشكلو 70% من محتوي وجسم الخلية وبيساعدو في تحفيز وتخزين النواقل العصبية ومستقبلاتهم وايضا بيساعدو في ارسال الاشارات العصبية بين الخلايا وبعضها والحفاظ علي الخلايا من الاضرار ورفع كفاءة عمليات ايض الدهون وتفعيل عدد كبير من انزيمات الجسد 

وبيتواجدو بشكل مكثف علي جدران الجلايا ومداخلها وبيتحكمو بشكل مباشر في تركيب وشكل الخلية وقدرتها على التأقلم والدهون دي بتقدر تفعل البروتينات والجينات المسئولة عن تقليل الالتهابات ومحاربة الاكسده في الجسد وبيحافظو علي عمل بعض الانزيمات المهمه جدا في نقل الاشارات العصبية في الجسم وخصوصا في تنظيم وتفريغ أيونات الكالسيوم في الدماغ والايونات دي مسؤولة بشكل مباشر عن تحفيز وإفراز النواقل العصبية وتفعيل الجينات وتحفيز عمل الميتوكوندريا 

واخيرا حمض الـ dha مسؤل بشكل مباشر عن زيادة مستويات عوامل النمو في الدماغ زي عامل التغذية العصبية المستمد من الدماغ – brain derived neurotrophic factor

ودا بيسمح بتخليق خلايا عصبية جديده ودا بدوره بيسمح بتخليق مسارات عصبية جديدة وبيوفر مرونة في خلايا دماغك العصبيه ودي حاجه هشرحها في فيديو لوحده 

وكمان الحمض الدهني دا بيقدر يقلل من افراز بروتينات الالتهاب زي الـ cox-2 ودا بروين بيقدر يزود من عوامل الالتهاب زي السايتوكينز كمثال .. ومعظم مضادات الالتهاب زي الاسبرين بتقدر تقلل الالتهاب عن طريق قمع عمل البروتين دا وبكدا عرفنا امور كتير ومميزات رهيبه عن حمض ال dha 

طيب اذن ليه كل مكملات الاوميجا في العالم بتحتوي علي نسب اعلى من ال epa ونسب أقل من ال dha ؟؟

دا بسبب ان حمض الـ epa ارخص بكتير وحمض الـ dha اغلي بكتير في التصنيع والتحصيل وكمان رائحة الـ dha قوية ونفاذه جدا وهيكون صعب علي الزبون انه يتقبلها .