اتفرج قبل ما تشتري مكملات الاوميجا-3 ..

 

لو بتحاول تعرف فوائد الاوميجا-3 لجسمك وعقلك واعصابك وقلبك وشرايينك فالمقال دا اتعمل مخصوص ليك .. ولو بتحاول تنشط ذاكرتك وتقوي تركيزك وتزود ذكائك وتعالج الاكتئاب فالمقال دا ليك

لو بتحاول تفهم الفرق ما بين انواع ودهون الأوميجا-3 فالمقال دا ليك ..لو بتحاول فهم الفرق بين دهون الاوميجا-3 ودهون الاوميجا-6 فالمقال دا ليك ..لو عاوز تشتري مكمل اوميجا 3 وبتدور علي افضل نوع فالمقال دا برده ليك

للاسف لو بحثت عن اي مقال بيكلم عن الاوميجا3- مش هتلاقي المحتوي التفصيلي الدقيق الي نفسك تشوفه واللي انا هقدمهولك فالمقال دا وانما هتلاقي كلام عام عن أن الاوميجا مهمه للصحه والجسم والخ بدون اي تعمق في التفاصيل وشرح لطبيعة عمل الدهون دي وتقسيمها واهميتها لجسمك ولذالك هنقسم فالمقال دا لاكثر من قسم ودا هيكون اول جزء

في الحقيقه ان الجسم البشري بيقدر يصنع معظم انواع الدهون بشكل طبيعي .. وبيقدر يصنع الدهون دي من دهون تانيه بتكون هي حجر الاساس عن طريق تفاعلها مع انزيمات معينه  .. ولكن للاسف الجسم البشري مبيقدرش يصنع دهون الأوميجا-3 بنفسه 

ولذلك بنصنف دهون الاوميجا3 علي انها دهون أساسية ودا لان الجسم مبيقدرش يصنعهم بشكل طبيعي والطريقه الوحيده علشان نحصلهم هو من الخارج سواء عن طريق الاكل او المكملات 

واهمية النوع دا من الدهون بيرجع لقدراتة الرهيبه في تقليل مستويات الاكسده والالتهابات في الجسم وكمان بتعتبر جزء مهم جدا بيشارك في تكوين اغشية الخلايا .. ودي زي البوابات كده اللي بتسمح بنفاذ ودخول المغذيات للخلية علشان يتم استخدامها لتوليد الطاقة من الميتوكوندريا وبناء البروتينات و الكودونات 

كمان الاوميجا-3 بتساهم في تخليق هرمونات مهمة مسؤولة عن عمليات تجلط الدم من الجروح وكمان حماية جدران الأوردة والشرايين من الاضرار والالتهابات ونقل الكوليسترول الضار والدهون الثلاثيه خارج الأوردة والشرايين عن طريق رفع نسب الكوليسترول الجيد وفي الحقيقه ان الدراسات اثبتت ان تناول الاوميجا-3 او دهون الأسماك قادر على حماية القلب من الجلطات وتنظيم معدلات النبض وتقليل ضغط الدم وزيادة العمر بشكل ملحوظ افضل من اي دواء اخر

دهون الاوميجا-3 هي دهون غير مشبعة وبنسميها بالانجليزي (polyunsaturated fatty acid) وعائلة الدهون الغير مشبعة دي بتنقسم الي نوعين مهمين وهما كالاتي :
1- دهون غير مشبعه أحادية – Monounsaturated Fats
2- دهون غير مشبعه عديده – polyunsaturated Fats

والاوميجا-3 بتنتمي للدهون الغير مشبعة العديدة و والدهون دي هي ايضا بتتنقسم الى 3 انواع وهما كالاتي : 

1- حمض الإيكوسابنتاينويك – eicosapentaenoic acid ودا بنختصره الي EPA

2- حمض الدوكوساهكساينويك – docosahexaenoic acid ودا بنختصره الي DHA

3- حمض حمض ألفا-اللينولينيك – Alpha linolenic acid ودا بنختره الي ALA

ودا ياخدنا الي نقطه تانيه وهي ايه الفرق بين التلاته دول ومين اهم من التاني ومين افضل من التاني في تقديم كل مميزات الاوميجا-3 ؟

في الحقيقه ان ال epa وال dha بنقدر نحصل عليهم من المأكولات البحريه او المكملات في حين ان ala بنقدر نحصل عليه من زيوت الخضراوات والبذور زي بذور الكتان وبذور الشيا والي بيروج ليهم علي انهم طعام خارق ودا قمة العبث في الدنيا وايضا زيت بذزو الكتان والكنولا وعين الجمل وايضا من دهون الحيوانات 

ولكن دهون ال ala بتخش في عملية كبيره في الجسم علشان تتحول لدهون الاومجيا الحقيقيه وهي ال epa وال dha وفي الحقيقه انا مبفضلش استهلاك او الاعتماد علي النوع دا لتحصيل دهون الاوميجا وانما بفضل اعتمد علي المصادر المباشره لاحماض الاوميجا الدهنيه الطبيعية زي السردين ودا اهمهم وافضلهم وارخصهم كمان واتمني منكم استهلاك السردين بشكل اكبر وكمان اسماك الانشوفه والسلامون والماكاريل والرنجه والقد

ويفضل لو كانت أسماك بتعيش في المحيط مش في مزارع الأسماك المليئة بالمضادات الحيوية ومبتتحركش ولا بتاكل اكل بيرعي فالطبيعة وهتقولي طب ليه اكل سردين وانشوفه والسمك الصغير اوي دا مش سمك القرش والكابوريا كمثال افضل؟؟ 

هقولك لان السمك الكبير والقشريات دول بيضطرو يعيشو في الاعماق وبالتالي بيكونو محملين بنسب عالية جدا من الزئبق ودا مادة سامه جدا للبشر إنما الاسماك الصغيره حركتها بتكون اعلي ومش بتعيش في الأعماق وبتتغذي في الاغلب علي الطحالب 

والسر كله في الطحالب لان الطحالب هي المخلوق البحري الوحيد تقريبا الي بيحمل في جيناته وجسده الانزيمات اللازمة لصنع احماض الاوميجا-3 ولما السمك الصغير يتغذي عليها دا بيخليه سمك دهني مليان دهون اوميجا وكالسيوم كمان  لذلك كل سردين 3 مرات في الاسبوع علي الاقل 

وبالمناسبة عندنا اقليم في إيطاليا اسمه اقليم ساردينيا ودي مدينة ساحلية عايشين على المأكولات البحرية والزيت الزيتون والابجاث لقت ان الناس هناك بيعيشو لأكثر من 100 سنه بدون أي امراض عقليه او صحية

وخلينا نكتفي بالقدر دا علشان المقال ميطولش مننا وفي المقال القادم نحكي عن امور أكثر أهمية ونقارن بين دهون الـ epa ودهون الـ dha ونشوف مين اهم وليه 

ونتكلم بشكل دقيق ومفصل عن دور الدهون دي في دعم الاعصاب والنواقل العصبية وتكوين وحماية الخلايا العصبية بشكل دقيق جدا ونشوف انهي مكمل انا بحب اعتمد عليه لتحصيل نسب الاوميجا بتاعتي ونحكي اكثر في الأحياء الخلويه 

تحياتي ك/ محمد مصطفي