الكشف عن سايكل هرمون دالاس مكارفر (سايكل الموت)

في هذا المقال هنتكلم عن اخر سايكل دالاس مكارفر كان ماشي عليها والي تم تسميتها بسايكل الموت من تشاد نيكلوز .. وهنعرف ايه مكونات السايكل دي بالظبط وهل هي فعلا سايكل حقيقة وهل تشاد نيكلوز هو الي كتبها ولا لا !! وهنتكلم عن تقرير الطب الشرعي عن المواد الي لقوها في جسم دالاس وعن سبب الموت .. فتابع المقال للاخر لانك هتعرف منه الخلاصة والحقيقة

اولا مين هو دالاس مكارفر ؟؟ 

دالاس صاحب ال 21 سنه والي وزنه وصل الي 300 باوند وطوله كان 185سم .. قدر يكسب كارت الاحتراف في سن ال 21 سنه ودا شئ رهيب .. وقدر يحصد مركز ثامن في بطولة الاولمبيا في الوزن المفتوح سنة 2016 .. ولكن للاسف المشكة بدات في سنة 2017 في بطولة ارنولد كلاسيك المقامة في استراليا حيث ان دالاس فقد الوعي وهو علي المسرح .. وبعدها بفترة قصيرة وفي نفس السنة تم العثور عليه ميت في بيته فتعالو نتكلم عن سايكل الموت الي كان ماشي عليها دالاس قبل موته

خلينا نبداء باني اقولكم اني شوفت 3 نسخ للسايكل دي بجرعات مختلفة ولكن بنفس المركبات في كل نسخه من التلاته .. وخليني اقولكم ان تشاد نيكولز صرح انه مكتبش السايكل دي وليس له اي علاقه بيها من قريب او من بعيد وصرح ان السايكل دي كانت قبل او بعد ما دالاس مكارفر بدأ يشتغل معاه .. وتشاد قال في تصريح ان دي مش سايكل اساسا وانما لستة مشتريات مدرب دالاس اعطاها ليه علشان يحضرها واعتقد ان المدرب دا هو مات جينسن .. ولكن الجميع متفقين علي ان دي كانت سايكل دالاس مكارفر 

فخليني اذكرلكم السايكل بكل تفاصيلها .. 

دالاس كان بياخد 22 يونت من هرمون النمو في اليوم خليط ما بين 12 يونت سيروستيم و 10 يونت هيوماتروب وفكرة انك تدمج نوعين جروث هرمون مع بعض فكرة غير منطقية كان ممكن ياخد ال 22 من نوع واحد فقط .. مفيش اي افضلية لدمج نوعين 

ايضا كان بيدمج ما بين انواع الانسولين حيث انه كان بياخد 25يونت من الانسولين السريع هيمالوج مع الانسولين المطابق للانسولين الطبيعي هيمالين ار وكان بياخد ال 25يونت من 6 الي 8 مرات في اليوم .. وكان بيحقن بشكل يومي 100يونت من الانسولين الطويل لانتوس علي الريق .. بالنسبالي انا احب استخدام اللانتوس مع الهيمالوج ولكني مبحبش استخدام الهيمالين ار ودا راجع لاسباب قولتها قبل كده في فيديوهات شرح انواع الانسولين

كان بيستخد من 10 الي 15 مج من ببتايد ال IGF-1 ودا عامل البناء الشبية بالانسولين وكان بيحقنه في ايام التمرين فقط

كان بياخد انابولون والي هو انادرول بجرعة 100مج 4 مرات في اليوم .. يعني 400مج .. دا لوحده يجبلك فشل في الكبد والكلي 

ايضا كان بيستخد مركب اسمه EPO ودا اختصارا الي erythropoietin ودا بروتين في الجسم مسؤول عن تخليق كرات الدم الحمراء ومش قادر اشوف اي سبب يخلي لاعب كمال اجسام يستخدمه بالكميات دي حيث انه كان بيحقن 16 الف وحده دولية منه في الاسبوع ودا رقم مرعب الحقيقه والمركب دا كفيل لوحده يخلي دمك سميك جدا ويجيلك جلطه 

ايضا كان بيستعمل 10مج من هرمون الهيلوتستن 4 مرات في اليوم لمدة 8 اسابيع ومن ثم بيريح منه 8 اسابيع .. الهرمون دا واحد من اقسي الهرمونات علي جسمك وانا اخري استخدمه لمدة اسبوعين او تلاته بجرعه لا تتعدي ال 20مج .. غير كده ممكن يسببلك فشل كلوي 

نخش علي الماسترون كان بياخده بدرعة 100مج في اليوم ودا ما يعادل 700مج في الاسبوع 

ومن ثم كان بياخد هرمون الغدة الدرقية T3 بجرعة 25ميكروجرام 3 مرات في اليوم يعني 75ميكروجرام .. ودي جرعة مرعبة عمري ما هحب اوصلها .. والغريب هو استخدامه لهرمونات الغدة الدرقية في فترة الضخامة .. والاغرب هو استخدامه لل T3 بدون ال T4 .. 

ايضا كان بيحقن 1000مج في الاسبوع من الديكا السريعه المسماه بالناندرولون فنيل بروبيونيت 

وكان بياخد بريموبولان بجرعة 1000مج في الاسبوع

وكان بياخد ونسترول بجرعة 100مج فاليوم ودي حاجه غريبة برده حيث انك مش محتاج تستخدم الونسترول في فترة الضخامة .. بتحتاج فقط تست وديكا وماسترون وبنحاول نبعد عن اي هرمونات اقراص لتقليل الالتهابات والاكسدة والحمل علي الكبد والكلي 

وكمان كان بياخد نولفاديكس بجرعة 40مج او كان بيبدلها بجرعة 1مج اريمادريكس يوم بعد يوم 

ومع كل دا كان بيستخدم ترنبلون بطئ الي هو ترنبلون هيكسا بجرعة 1000مج في الاسبوع ومعاهم ترنبلون سريع الي هو ترنبلون اسيتيت بجرعة 1400مج في الاسبوع يعني كان بياخد 2400مج ترنبلون فقط في الاسبوع 

وفوق كل دا كان بياخد تستوسترون انانثيت بجرعة 800مج معاهم تيستوستيرون ساسبنشن بجرعة 1400مج في الاسبوع غالبا كان بياخده قبل التمرين كبري وارك اوت ومعاهم ساستنون ودا عبارة عن خليط من الاسترات بجرعة 1250مج في الاسبوع

واخيرا كان بياخد بولدينون بجرعة 1200مج في الاسبوع

طيب تعالو نتكلم عن المهم .. هل انا مصدق انه كان بياخد كل الهرمونات والجرعات دي ؟؟ 

لا طبعا مش مصدق .. انا اطلعت علي بعض من بروتوكولات تشاد نيكولز وعمري ما شوفت كمية الجرعات دي وكمية المواد دي .. طيب هل ممكن يكون مات جينسن الي كتب الجرعات دي ؟؟ ممكن طبعا ولكني برفض تصديق ان اي بني ادم يقدر ياخد كل الجرعات دي في الاسبوع .. الجرعات مرعبة الحقيقه يعني لو السايكل دي حقيقية فدالاس مكارفر كان بيحقن ما لا يقل عن 13جم من الهرمونات في الاسبوع .. يعنب بحسبة سريعه كده نقدر نستنبط انه كان بيحقن ما لا يقل عن 11مل من الهرمون في اليوم يعني 77مل من الزيوت والهرمونات في الاسبوع .. ومش قادر استوعب ازاي الجسم البشري ممكن يتحمل كمية الزيوت دي .. دا غير انه كان بياخد قرابة ال 550مج من الهرمونات الاقراص فقط بعيد عن الحقن .. ودا لوحده يجبلك فشل كلوي ويدمرلك الكبد في ظرف اسبوعين حرفيا 

انما بالنسبة لاستعمال الجروث هرمون حيث انك كان بياخد 22يونت فاليوم فدا معناه انه كان بيصرف ما لا يقل عن 250دولار علي الجروث هرمون فقط .. يعني في السنة 90الف دولار فقط علي الجروث هرمون دا غير انه كان بيصرف قرابة ال 2000دولار علي الهرمونات في الشهر فقط .. دا غير طبعا استعماله لل IGF1 والي بيكلف 6000دولارللعبله الواحده فقط .. بعيدا عن المايات تصميم السايكل دي غريب جدا وعشوائي جدا ومفيش اي فلسفه ا منطق في جمع كل الهرمونات دي مع بعض وفي استخدام الكميات المرعبه دي من الهرمونات 

طيب هل المحترفين بياخدو جرعات كبيره ؟؟ اينعم بياخدو ولكن في حدود ال 3 الي 5جم في الاسبوع دا علي مستوي المحترفين انما تعدي ال 15جم في الاسبوع دا شئ مفجع .. كمثال دوران ييتس كان بيستخدم 2جم من الهرمونات فقط ودا كان واحد من اضخم لاعبي كمال الاجسام واشهرهم ولسه عايش لغاية يومنا هذا 

طيب بالنسبه لتقرير الطب الشرعي .. سبب موت دالاس مكارفر كان تصلب في الشرايين وتضخم في البطين الايسر وفشل في عمل القلب .. وقصه انه مات من استخدام الانسولين دي قصه غير حقيقية .. والطب الشرعي وجد ان دالاس كان عنده تضخم في القلب وقلبة كان يزن 833جم في حين ان قلب الشخص الطبيعي وزنه 300جم .. وطبعا كان عنده تصلب شديد جدا في الشرايين والاوعية بسبب ارتفاع ضغط الدم .. ووجدو انه كان عنده تضخم في الرئتين .. وتصلب وتضخم في حجم الكبد والكلي .. وفوق كل دا كان عنده سرطان في الغدة الدرقية هو نفسه مكانش يعرف عنه اي شئ 

وطبعا الطب الشرعي وجد ان نسب التسوسترون في بلازما الدم عند دالاس تعدت ال 55الف نانوجرام لكل ديسي ليتير في حين ان الشخص الطبيعي بيتراوح ما بين ال 300 الي 1000جم لكل ديسي ليتر .. والطب الشرعي لم يجد اي مواد مخدرة في الدم غير المارجوانا .. ولم يجد اي بقايا لاي هرمون اخر غير التستوسترون والترنبلون وبالتالي ف دا سبب زيادة يخليك تتاكد ان السايكل دا مش حقيقية والا كان هيتم العثور علي ميتابولايتس في جسم دالاس من الديكا والبولدينون علي الاقل حيث انهم بياخدو وقت طويل للخروج من الجسم