تخلص فورا من ارتفاع ضغط الدم واحتباس الماء والسوائل من المنشطات

في هذا المقال هعرفك ازاي المنشطات بترفع الضغط عندك وازاي تنظم ضغطك وهنعرف ازاي نعالج احتباس الماء والصوديوم الي بيسبب ارتفاع الضغط وهنعرف ازاي جسمك بينظم مستويات الضغط بشكل طبيعي ؟؟ وايه هو هرمون الالدوستيرون وايه هو نظام الرينين أنجيوتنسين وايه هي مدرات البول زي الالداكتون وبتشتغل ازاي ؟؟ وليه بناخد دواء التلميسارتان عند استخدام المنشطات فتابع المقال للاخر 

مبدئيا كده لازم تعرف ان في نظام كامل في جسمك مسؤول عن تنظيم ضغط الدم والنظام دا اسمه نظام ال RAAS ودا اختصارا الي renin-angiotensin-aldosterone system فنفهم من كده ان النظام دا مكون من امور كثيره اولهم انزيم الرينين

ثانيهم هرمون الانجيوتنسن

ثالثهم هرمون الالدوستيرون

وكل دول مجتمعين مع بعض بيكونو نظام ال RAAS .. ومن نعمة ربنا علينا انه خلق في اجسامنا النظام دا والي بيتم تفعيله بشكل تلقائي في حالتين اولا في حالة انخفاض ضغط الدم .. ثانيا في حالة انخفاض كمية وحجم بلازما الدم في الاوردة والشرايين زي انك تتجرح وتفقد كمية من الدم كمثال .. وبالتالي ف وظيفة النظام دا هو انه يرفع ضغط الدم ويزيد من حجم بلازما الدم 

قبل ما نتكلم عن انزيم الرينين لازم نتكلم الاول عن الكلي وهي العضو المسؤول عن فلترة الدم من السموم وطردها خارج الجسم في عملية التبول .. الكلية بيكون فيها اشياء صغيرة كده بنسميها بالنفرونات .. والنفرونات دي بتحتاج انها تفلتر 120ملي ليتر من الدم كل دقيقة .. ولو متابعيني بشكل جيد هتعرف اني اتكلمت قبل كده عن اهم تحاليل الكلي ومن ضمنهم تحليل ال egfr ودا اختصارا الي (Estimated Glomerular Filtration Rate) التحليل دا يقيس بدقة عاليه معدل فلترة النفرونات دي خلال دقيقة واحدة والقياس بيورينا الكلي بتفلتر كام ملي ليتر من الدم خلال دقيقة واحد وبالتالي نقدر نقيس ونستدل بيه على كفاءة عمل الكلى وبنعرف منه اذا كان في اي مشكلة في الكلي

داخل النفرونات دي بيتواجد نوع من الخلايا بنسميها Juxta-glomerular cells الخلايا دي هي المسؤولة عن افراز انزيم الرينين .. وبيتم افراز انزيم الرينين في 3 حالات اولا انه يحصل انخفاض في ضغط الدم .. ثانيا انه يحصل انخفاض في مستوي الصوديوم في الدم .. ثالثا انه يتم تحفيز الجهاز العصبي السمبثاوي والي بيقدر بشكل مباشر يحفز النفرونات علي افراز انزيم الريني

طيب ازاي الهرمونات والمنشطات بتؤثر علي زيادة افراز انزيم الرينين في الجسم وبالتالي بترفعلنا ضغط الدم ؟؟ 

تفسيري الشخصي واجتهادي في الموضوع دا هو انه بيحصل بسبب ان الهرمونات الاندروجينية بتساهم في زيادة افراز هرمون الادرينالين والنورادرينالين وبالتالي بيحصل تفعيل اكبر للجهاز العصبي السمبثاوي وبالتالي بيتم زيادة افراز انزيم الرينين وايضا زيادة في افراز هرمون الالدوستيرون وهنتكلم عنه كمان شوية

حاليا عندنا انزيم الرينين متاح في مجري الدم .. هنا يجي دور الكبد الي بيقوم بأفراز الشكل الاولي لهرمون الانجيوتنسن وبيكون مخزن في الكبد علي شكل (angiotensinogen) وفورا لما انزيم الرينين يقابل هرمون الانجيتنسنجن بيقوم بتحويله الي هرمون الانجيوتنسن النوع الاول .. ومن ثم الرئة بتقوم بأفراز انزيم اسمه (ACE) ودا اختصارا الي (Angiotensin converting enzyme) والانزيم دا بيقوم يحول النوع الاول من الانجيوتنسن الي النوع الثاني .. واحنا اساسا ميهمناش الشكل الاول لانه ضعيف جدا .. وانما يهمنا الشكل التاني .. وهرمون الانجيوتنسن بيقدر يضيق الاوعية والشرايين وبالتالي المقاومة بتزيد وبالتالي ضغط الدم بيرتفع .. وبيقدر يرفع مع معدل اعادة امتصاص الصوديوم من الكلي وبالتالي الضغط بيرتفع اكتر .. وفوق دا كله فالانجيوتنسن بيقدر يتواصل بشكل مباشر مع الغدة النخامية ويحثها علي افراز هرمون اسمه فازوبريسين (vasopressin) ودا هرمون مضاد لإدرار البول .. بمعني انه هيمنع الجسم من اخراج البول وهيحث الكلي علي اعادة امتصاص الماء وهيجعله يحتفظ بالماء لفترة أطول .. وبالتالي حجم بلازما الدم هيزيد والمقاومة هتزيد وضغط الدم هيزيد  

واخيرا الانجيوتنسن بيقدر يحفز الغدة الكظرية علي افراز هرمون الالدوستيرون .. والالدوستيرون هو هرمون حفظ واعادة امتصاص الصوديوم .. واحنا عارفين ان دائما وابداء الماء بيتبع الصوديوم اينما ذهب .. وبالتالي لما يتم اعادة امتصاص الصوديوم من الكلي وارجاعه الي مجري الدم هيتم ايضا اعادة توجيه الماء الي مجري الدم .. وبالتالي حجم بلازما الدم هيزيد .. وبالتالي حجم المقاومة الواقعه علي الاوردة والشرايين هيزيد وبالتالي الضغط هيرتفع .. 

اذن لما بناخد دواء التلميسارتان في سايكل الهرمون بنمنع هرمون الانجيوتنسن من انه يرتبط مع مستقبلاته وبالتالي بنقلل من تواجد الالدوستيرون وبنقلل من تواجد الصوديوم وبنقلل من ضغط الدم وبنحمي القلب والكلي والشرايين من ارتفاع ضغط الدم 

ولما بناخد دواء ليسبرو بدلا من التلميسارتان في الحاله دي بنمنع افراز انزيم ال ACE الي اتكلمنا عنه في البدايه وبنمنع تصنيع هرمون الانجيوتنسن من الاساس وبالتالي بينتج نفس الخصائص في خفض ضغط الدم 

وفوق دا كله اوقات بيتم وضع مرضي الضغط علي مدرات البول زي مدر البول المعروف باسم الداكتون .. ودا بيقدر يمنع ارتباط هرمون الالدوستيرون مع مستقبلاته وبالتالي فالالداكتون بيمنع الجسم من الاحتفاظ بالصوديوم والملح .. 

ولو حسيت ان الفيدو معقد .. يا ريت تشوفه مره واتنين وتلاته الفيديو دا انا تعبت في تحضيره جدا .. ومهم جدا لفهم كيفية التلاعب بالماء والصوديوم في حياتك العاديه وفي اسبوع البيك ويك والي بيكون قبل البطولة مباشرة .. وان شاء هبقي اعملكم فيديو عن طرق التحميل وسحب الماء قبل البطولة مجانا زي كل المحتوي الي بقدمه والي يسوي فلوس كتير اوي 

تحياتي ك محمد مصطفي